الزمن الفلسطيني بالكيلو – نضال حمد

الزمن الفلسطيني بالكيلو …
بدي كيلو من “الخيار” الوطني ..
وكيلو مبادئ وكيلو ثوابت
وثلاثة كيلوغرمات: واحد فداء والثاني عودة والثالث تحرير.
وبدي كيلو ونص “قرار مستقل”، علشان أقدر أعمل “سلطة” و”مقلوبة”. وبدي أوقية “شرعية” لعمتي “صفية” علشان وصفة طبخة منظمة التحرير الفلسطينية.. وربع أوقية “ممثل شرعي ووحيد” لخالتي أم وحيد.
وبدي كيلو تفاح علشان أختنا “سماح” تتمزمز عليه بعد المصالحة ..
وكيلو “احلام” علشان المزمزة عليه بعد تحقيق كذبة الوحدة الوطنية وانهاء الانقسام بين المنقسمين على السلطة الشهية والمقلوبة الوطنية. و
لا تنسى تضيف عليهم كيلو “كرار” نصفه “قرار” والنص الثاني “مستقل” .. مليح هيك يا أخونا عزام…؟
وبلاش النبيذ لأنه حرام…
ولا بضاعة الاحتلال لأنها كمان حرام …
وفي الختام يا ريت سوق التجارة يرتاح منك ومن إخوتك الأربعين علي بابا و”باباهم” … ومن أخواتك أمهات الأربعة وأربعين. ومن تجار ” الوطن” و “المنفى” وتجار “البندقية” والشرعية الفلسطينية وكمان من تجار الفتاوي والدين.. ومن تجار المفرد والجملة الجالسين على صدور الناس والمنسقين مع الوسواس الخناس.. أعود من شرهم ومنهم ومن كل شرير موسوس وخناس.
نضال حمد
8-8-2021