ملاك خالد عن مدينة صور
بوح شخصي وحميم عن مدينتي، عن حبيبتي، عن قلب قلبي #صور
عم بكتب لاتذكر.
عم بكتب لاشوف بعدين انو هاليوم قطع.
اليوم صعب. صعب كتير. يمكن اصعب يوم من يوم البيجر واستشهاد السيد.
فقنا ع خبر مجزرة ببيت جيراننا. وبلش الوجع..
ومن بعدها كل شوي: ضربوا بناية كزا بشارع كزا.
كل غارة ع صور وكل ضربة، نزلت بقلبي.
انا بعرفش بالدنيا محل اسمه بيتي غير صور، تغربت ورجعت ع صور وعشت ببيروت نص عمري بس بحس حالي دايما عابرة فيها، مستأجرة وبعد شوي بيخلص عقد الاجار. بكل الدنيا عندي عقد اجار،الا بصور،اقامتي الاخلى بحياتي، وحضنها وحضن بابا يدفوني بالموت.
ما بعرف اشتري غرض غير بصور ولا بعرف اروح عند دكتور او اضهر او انبسط او اسبح او ارتاح او اكزدر غير بصور. بوصل ع صور بدق لصديقة طفولتي، بلفلف ع بيوت العيلة. بمرق بسلم ع الجيران، بتقصر طلعة الدرج خمس طوابق. صور هي مراية البحر والسما ومراية الروح..
صور قبر بابا والعيلة والاصحاب الكتار اللي صاروا بدنيا الحق، صور طفولتي. بحرها من ضحكاتي ودموعي، اثارها زي عظامي، وشوارعها شراييني. صور هي احلامي ونجاحاتي وافراحي واربكاتي واكتشافاتي وهي الدفا وهي المشاوير الحلوة وشمس الايام السعيدة اللي شكلها صارت بس ماضي.
اليوم واحد من أصعب ايام عمري. مش عشان بيوت تهدمت وشوارع تغير كل شي فيها، عشان اللي بيحبه الواحد بوطنه هو كل شي، كل شي، حتى الحجر!
لما العدو يفهم شو بنحس، رح يعرف ليش بنقاتل بكل روحنا ع كل حجر تحت سما بلادنا. بس عدونا طارئ، عابر زي سطرين بكتاب تاريخ كامل اسمه نحنا. ونحنا، ولاد البحر اللي ما ينام وولاد مدن التاريخ، بنعرف قيمة الحجر، وبنحب حتى الحجر.
وصور مش بس مدينة، صور الحجر ع حجر اللي عمروه ناسها من كم الف سنة. صور اول الدني، صور ذكرى يومية ومستمرة بعين الزمن من حجار وعصور كتيرة تركلنا اثارها الانسان اللي علم وبنى ووسع وابتكر وتصيّد وصنّع وعطى الدنيا الوانها.
بس هالعدو وحش،عنجد وحش من غبار. مش انسان ولا رح يكون او يفهم شو يعني انسان يموت لاجل حجر، لانو فش انسان بيقدر يرشق صور بحجر.
