مناكفات:عاطف ابو بكر/ابو فرح : {{ آآآآآآخْ،،مْنِ المخابراتْ}}

١-

تْنازَلْ عنِ الجنسيّهْ

وْكانتْ طبعاً مصريِّهْ

لَيِحْمي حالو بِالسجْنْ

وِاتْحامى بِالكَنَديِّهْ

٢-

مُراسلِ الجزيرِهْ

السِجِنْ حطُّوا بِحِيرِهْ

وْحَلَفْ ما بَسْكُنْ بِبْلادْ

بْتِتْلاعَبْ بِمَصيري

٣-

الجنسيِّهْ الأجنبيِّهْ

بِحْتِرْموها يا بْنَيِّهْ

وِالجنسيِّهْ الوطنيِّهْ

اٌنْقَعْها، وِاٌشْرَبِ الميِّهْ

٤-

حتِّى الإسرائيليِّهْ

بْتِتْلاقى بالتَحِيِّهْ

وْمِثِلْها أَلِفْ يا رِيِتْ

بِعامْلوا الوَطنيِّهْ

٥-

سَكِّرْ ثُمَّكْ بِبْلاسْتَرْ

أحسنْ حياتَكْ تِخْسرْ

وْيِمْكنْ تُتَّهَمْ إرهابي

أوْ تُوخِذْ تُهْمهْ أخْطَرْ

٦-

وِيِنْ حريِّةْ الإعلامْ

صارَتْ بِبْلادْنا كَلامْ

وإذا بْتِخْرُجْ عنِ السَطْرْ

بالسِجِنْ، تاتِّخْتخْ بِتنامْ

٧-

مَسْحوبِهْ مِنٌِي الجنسيٌِهْ

شِنِّي ما رْضيتِ الدَنِيِّهْ

وْبِبْلادْنا المُخابراتْ

هِيْ بِتْقَرِّرْ يا خْيِّهْ

٨-

بِبْلادْنا العربيِّهْ

حتٌَى توخذْ جِنْسيِّهْ

لازمْ معِ المباحثْ

تْطَرِّيها إنتِ شوَيِّهْ

٩-

وْإذا بِتْقسِّي راسكْ

بِنْعلولَكْ أساسكْ

وْبِدَكْ تْظلِّ تْراجعْ

تا تِحْترقْ أنْفاسَكْ

١٠-

وإذا ما بدَّكْ أزَماتْ

لا تْعادي المخابراتْ

وإذا بدّكْ تْعادي

بِتْدوخِ السبِعْ دُوخاتْ

١١-

ضابطْ ما خلَّصْ صفِّينْ

بِحْجزْ جوازكْ سنْتينْ

وِبْجَرِّةْ قلَمْ بِلْغيهْ

وْبِتْغنِّي يا ليلْ يا عينْ

١٢-

ضابطْ يا عالَمِ زْغيرْ

بِتْحَكَّملكْ بالمصير

مُمكنْ يِرْزَعكْ بالسِجْنْ

وْمُمْكنْ يِعْملكْ وَزيرْ

١٣-

بِدِسُّوا بْكُلْ شيْ الأُنوفْ

بْتاكُلْ كُوسا أو مَلْفوفْ

وِشُّو بعملوا الزُوجينْ

وْمِنِ اسرائيلْ ،ماكو خُوُفْ

١٤-

المُواطنْ عنْدِ المخابراتْ

مَشبوهِ بْكُلِ الأوقاتْ

حتَّى لوْ قَرا القُرآنْ

أو أدَّى فْروضِ الصَلاةْ

١٥-

بِقِرْفولوا حياتو

وْبِفْقَعولوا بِيِضاتو

وْلا يِخْلَصْ منهمْ لازِمْ

يِسْتَعْجلْ بِمَماتو

١٦-

بِبْلادْنا المَجْلسْ لعبهْ

وْكِذْبِهْ بْتِلْحقها كِذْبهْ

ضابطْ مباحثْ زْغِيرْ

بِمُونْ، أكْثرِ بْحَبِّهْ

١٧-

ما سٍمِعنا بِالإغْتصابْ

إلّا بْسُجونِ الأعْرابْ

وْلوْ قُلِتْ هذا عَلْساني

بِقولولكْ ،شو كَذَّابْ

١٨-

حتَّى اٌغتصابِ الرجالْ

مَشروعِ بْعُرْفِ الأَنْذالْ

بِقولوا بْنِكْسرْ عينو

لَيقولِ مْلِيحِ الحالْ

١٩-

لكنْ عندي جنسيّهْ

مْنِ السلطهْ الوطنيّهْ

بَدْخلْ فيها كلِّ الكونْ

إلّا بْلادي الأصْليّهْ

٢٠-

وإذا ما برضو عنّكْ

الجنسيّهْ بِتْطِيرْ منّكْ

وْيا عيني عْ هيكِْ بْلادْ

وِاحْزِرْ مينْ هي يَا مْحَنَّكْ

٢١-

الفلسطيني عندو الحُدودْ

عدُوِّهْ مِثْلِ اليهودْ

بِعْبرْ شْوَيِّهْ وِالباقي

بِتْقولّوا لَبلادك عُودْ

٢٢-

الفلسطيني أوْجاعو كْثيرْ

مْنِ الّي خانوا التحريرْ

لمَّا بِوْصَلْ لَحْدودْهُمْ

عقلو مْنِ القْهِرْ بِطِيرْ

٢٣-

بدَلْ تقْديرِ الظروفْ

اللعبْ بِصير عالمكشوفْ

حتٌى لوْ حملْ أمريكي

عِنْدِ العربْ بِحْميهوشْ

٢٤-

عنَّا وَاللَّهِ الحدودْ

مكروههْ مِثْلِ اليهودْ

لأنُّو فيها بْنِتْمرمَطْ

وِبْنِتْعامَلْ مِثِلْ لِقْرودْ

٢٥-

جوازَكْ خَيِّي السلاحْ

بْأَيامو، كُنِتْ مِرتاحْ

كُنْتِ بْتَصريحْ بو علي

بْتِعْبُرها مِثْلِ الرياحْ

٢٦-

بِتْقولوا ليشْ بْتِحكي

لِأَنُّو الحالهْ بِتْبَكِّي

المُواطنْ بِبْلادو مْبَهْدَلْ

وْممنوعْ منْ قهرو يِشكي

٢٧-

وْبقولوا عنّا حريٌِهْ

يِمْكنْ بِفصلِ الصيفيِّهْ

الناسْ حُرَّهْ بْتِتْعرى

وْما بْتِقدَرْ بالشتْويِّهْ

٢٨-

لو عشْنا بِالواقْ واقْ

أحسنْ عليِّهْ الطَلاقْ

عِيشتنا مِثِلْ لِكلابْ

وِالّي يِنفيها ،نِفاقْ

٢٩-

بْموزنبيقْ واللهْ الحياةْ

أحسنْ منْ عنّا بْمرّاتْ

صِرنا مِثْلِ السَنْدَوِيشْ

حَشْرَهْ منْ كلِّ الجهاتْ

٣٠-

لا تِسألْ عنِ الحريِّهْ

بِبْلادْنا العربيِّهْ

سْويسرا منّا بْتِتْعلَّمْ

وِبِسمُّونا رجعيِّهْ

٣١-

إحنا في كُلِّ الأقطارْ

عِيشتنا عِزِِّهْ وْفخارْ

وِالحريِّهْ مضمونهْ

للناسِ بِكلِّ الأعمارْ

٣٢-

لا تْقولوا إنِّي بَتْهكَّمْ

بْنيَّاتي، اللهُ أعْلَمْ

عِيشِهْ تَمامِ التمامْ

مليانهْ تَنْغيصُ وْهَمّْ

٣٣-

عنّا وَالَّلهْ الحُكوماتْ

عِصاباتُ وْمافْياتْ

بِقولوا بْنِحرَصْ عالشَعبْ

وْهِنِّ أكْبرْ عِصاباتْ

٣٤-

وْيا عيني البرْلَمَناتْ

قالْ إجُو باٌنْتِخَباتْ

وِالفَصيحْ مِنْهمْ وَاللهْ

ما بِرْعى ثلَاثْ عَنزاتْ

٣٥-

الحاضرْ يِعْلِمِ الغايِبْ

إحْنا صندوقِ العجايِبْ

يا ربِّي مِنْ هالحكّامْ

بِكَفِّينا مَصايِبْ

٣٦-

أُقْسمِ بالْلهِ الغُزاةْ

أشْرَفْ منْ هالحكومات

ما بْتِعْملَكْ أيْ خِدْمِهْ

وْكُلْ ساعهْ بِتْقُلَّكْ هاتْ

٣٧-

إذا بْتُهْجُرِ بْلادَكْ

وَاٌصْحابَكٍ وَاٌرْض اٌجْدادَكْ

العَسَسْ فتِّشْ عنْ دُورو

بْتَطْفيشَكْ معِ إوْلادَكْ

٣٨-

بِقولوا المخابراتْ

ذِمِّتْها مِثْلِ القَحباتْ

مهما بْتِعْطيهم بِقولوا

هاتْ يا أفندي هاتْ

٣٩-

عرَبي قَرَفولوا حالو

لَزَّقْ جَوازو بِنْعالو

وْبَعَثوا إلهمْ بالبريدْ

وْأَسْقَطْ بلَدو منْ بالو

٤٠-

خُلْقي وْخِلْقَكْ فَشِّيتو

بِالِّي ،هالمرَّهْ اٌحْكِيتو

حَطُّونا بِسِجْنِ كْبيرْ

وِالناقِدْ بِخْرَبْ بِيتو

٤١-

بِبْلادْنا ما في استثناءْ

منِ الألِفْ حتَّى الياءْ

المخابراتْ هِيِّ الحاكمْ

والحاكمْ أُذْنو صمَّاءْ

٤٢-

الحاكمْ أحْياناً أُلْعوبِهْ

وِالحُريِّهْ أُكْذوبِهْ

وْإذا بْتِسأَلْ عنها الناسْ

بِقولولكْ مَسلوبِهْ

٤٣-

أَصْلِ القَهِرْ وِالنَكْباتْ

بِبْلادْنا المخابراتْ

وِالمُواطِنِ الشريفْ

وَراهُ بْكلِّ الأَوْقاتْ،،،

————————————–

مناكفات:عاطف ابو بكر/ابو فرح

٢٠١٥/٢/١٥/م،،،،،،

ملاحظه،،اعتقد ،انني بماقلته اعلاه ،
انطق بلسان ومشاعر ومعاناة كل
فلسطيني عانى من الحدود والمخابرات
بكلّ اشكالها،وايضا كل عربي،وأنّ الكثيرين
ذاقوا مرارة ما اشرت اليه،،قفزتْ لذهني
هذه الصور،عندما سمعت ،ان مراسلا
مصرياً بسجن مصر ،تنازل عن جنسيته،
ليلقى معاملةً وحمايةً افضل،،ولا حول ولا
قوة الا بالله،،وهكذا كلّ بلاد العرب،للأسف،،